Ang pagpopondo ay susuporta sa broadband, pagpapaunlad ng negosyo at entrepreneurship, at dibersipikasyon ng ekonomiya

RICHMOND--Inanunsiyo ngayong araw ni Gobernador Ralph Northam na tatanggap ang Virginia ng limang grant na may kabuuang mahigit sa $2.8 milyon sa programang Partnership for Opportunity and Workforce and Economic Revitalization (POWER) ng Appalachian Regional Commission (ARC). Tatlo sa mga grant ay mga grant para sa implementasyong multi-estado. Ang isang grant ay mapupunta sa Bland County para sa pag-deploy ng broadband, at isang grant para sa teknikal na tulong ang mapupunta sa Friends of Southwest Virginia.

"Ang pagpapalago at pag-iiba-iba ng ekonomiya sa rehiyon ng Appalachian sa Virginia ay nangangailangan ng dedikadong diskarte sa pagpapalawak ng akses sa broadband, paghahatid ng pagsasanay para sa skilled workforce, at paglikha ng oportunidad sa ekonomiya at pagnenegosyo," sabini Gobernador Northam. "Ang mga grant na ito ay susuporta sa ating patuloy na gawain na gumagamit ng mga panrehiyong asset upang bumuo ng matatag na ekonomiya at tulungan ang ating mga komunidad sa Appalachian na umunlad."

Ang programang POWER ng Appalachian Regional Commission ay isang inisyatibong pinondohan ng kongreso na naglalayong maglaan ng mga pederal na mapagkukunan upang tulungan ang mga komunidad at rehiyon na naapektuhan ng pagkawala ng trabaho sa pagmimina ng karbon, operasyon ng planta ng kuryente sa karbon, at mga industriya ng supply chain na may kaugnayan sa karbon dahil sa nagbabagong ekonomiya ng produksiyon ng enerhiya sa Amerika. Sa anunsiyo ngayong araw, ang ARC ay namuhunan ng mahigit sa $144.8 milyon sa 182 mga proyekto na sumasaklaw sa 312 mga county sa buong Appalachia mula noong 2015.

"Ang anunsyo ngayong araw ay nagpapatuloy sa isang patuloy na pangako para sa makabagong pagpapaunlad ng ekonomiya sa mga komunidad na apektado ng karbon sa Virginia," sabi ng Federal Co-Chair ng ARC na si Tim Thomas. "Ang pamumuhunan sa mga pangunahing pangangailangang panrehiyon ngayon ay magbibigay ng benepisyo sa rehiyon, at sa iba pang bahagi ng bansa, hanggang sa hinaharap."

"Ang mga grant ng POWER ay isang kasangkapan na ginagamit namin upang pasiglahin at itulak ang pamumuhunang pang-ekonomiya sa rehiyon ng Appalachian," sabi ng Kalihim ng Komersiyo at Kalakalan na si Brian Ball. "Sa pamamagitan ng mga makabago at malikhaing pakikipagtulungan, nagtatrabaho kami bilang mga kasosyo sa buong Commonwealth, gayundin sa aming mga kasosyo sa estado ng Appalachian upang mapabuti ang kalidad ng buhay para sa lahat ng naninirahan sa rehiyon."

Ang Bland County ay makakatanggap ng $459,764 para sa proyekto ng Paglalagay ng Broadband sa Bland County. Ang proyekto ay magtatayo ng 33-milyang fiber run na gagamitin upang magsuplay ng broadband sa mga negosyo sa Bland County. Ang fiber run ay magsisimula sa Rocky Gap at tutungo sa timog sa pamamagitan ng Bastian at patungo sa Bland. Ang fiber ay tatakbo sa kahabaan ng koridor ng Route 52. Kapag tapos na ang konstruksiyon ng fiber, gagamit ang napiling ISP partner sa pamamagitan ng kompetisyon ng wireless na teknolohiya upang maabot ang mga karagdagang lokasyon sa labas ng Route 52. Gagawing available ng proyekto ang access sa internet para sa 37 na negosyo, gayundin sa mga Paaralan ng Bland County, mga tanggapan ng Lupon ng Edukasyon, at ang Bland County Medical Clinic, isang health center na kwalipikado sa pederal na antas.

Ang Friends of Southwest Virginia ay makakatanggap ng $100,000 para sa proyektong Building POWERful Economic Diversity and Sustainability within Appalachian Communities. Lilikha ito ng isang kolaboratibong plano sa pagitan ng mga estado para sa pagpapaunlad ng mga karaniwang likas at kultural na yaman na makakapagpalakas sa dibersipikasyon ng ekonomiya ng rehiyon. Ang prosesong ito ay mag-uugnay sa mga komunidad sa Timog-kanlurang Virginia sa kanilang mga kapitbahay sa North Carolina, Tennessee, West Virginia, at Kentucky, upang lumikha ng isang proseso ng pagtukoy at pagpaplano na hinihimok ng komunidad. Palalawakin nito ang mga kasalukuyang kolaboratibo sa loob ng saklaw ng Friends of Southwest Virginia, kabilang ang isang nakaraang proyektong POWER, lampas sa Timog-kanlurang Virginia upang bumuo ng mga likas at kultural na yaman at mga estratehiya na ibinabahagi sa mga kalapit na estado. Ang pagpaplano ng likas at kultural na yaman sa mga hangganan ng estado ay makakatulong sa pagbuo ng isang dibersipikado at napapanatiling ekonomiya para sa Central Appalachia.

Ang Appalachian Investors Alliance sa Knoxville, Tennessee, ay makakatanggap ng $577,840 para sa programang Angel Investing in Coal Communities. Batay sa naunang POWER grant, bubuo ang proyekto ng mga bagong Angel Investment Fund na magsisilbi sa mga komunidad na apektado ng karbon sa Appalachia at magbibigay ng teknikal at suporta sa pamumuhunan sa mga kasalukuyang pondo. Ang proyekto ay lilikha ng apat na bagong angel fund sa rehiyon ng Appalachian, na ang bawat isa ay may kapital na nasa pagitan ng $500,000 at $2 milyon ng pribadong financing. Bukod pa rito, magbibigay ito ng suporta sa due diligence sa mga angel investment fund sa Appalachian na walang propesyonal na staff sa pamamahala, magpapalawak ng mga alok na pang-edukasyon para sa mga investor at entrepreneur, at mag-isponsor ng referral network ng mga partner sa syndication at co-investment upang mapataas ang pamumuhunan sa rehiyon. Karaniwan, ang mga angel investment ay nakatuon sa mga kumpanyang sumusuporta sa advanced manufacturing, advanced materials, aerospace, pangangalagang pangkalusugan, teknolohiyang pang-agrikultura, at iba pang mahahalagang cluster ng industriya sa rehiyon. Inaasahan ng proyekto na ang mga aktibidad na ito ay magreresulta sa syndication at direktang pamumuhunan na $11.25 milyon sa leveraged na pribadong pamumuhunan, na may 25 negosyong pinagsilbihan, na humahantong sa 125 mga trabahong pang-entrepreneur na nalikha. Ang proyekto ay sumasaklaw sa Virginia, Alabama, Kentucky, North Carolina, Pennsylvania, Tennessee, at West Virginia.

Appalachian Sustainable Development (ASD), sa pakikipagtulungan sa Refresh Appalachia, Sprouting Farms, ang Kentucky Center for Agriculture and Rural Development, Community Farm Alliance, at Whitlock Farm, ay tatanggap ng $1.25 milyon upang palawakin ang epekto at saklaw ng Central Appalachian Food Enterprise Corridor sa apat na estado ng Appalachian. Sa pamamagitan ng nakaraang pondo ng POWER, ang Central Appalachian Food Enterprise Corridor ay epektibong nag-ugnay sa mga itinatag at umuusbong na prodyuser sa buong Central Appalachia sa mga pamilihan ng pakyawang distribusyon, na humahantong sa pagtaas ng pag-unlad ng negosyong pang-agrikultura at paglikha ng trabaho. Ang kasalukuyang proyekto ay magtutuon ng pansin sa mga bahagi ng corridor na nangangailangan ng karagdagang suporta sa pamamagitan ng pagpapataas ng teknikal na tulong at pagpapalawig ng mga epektibong kasanayan. Pagbubutihin nito ang network sa pamamagitan ng pamamagitan sa pagitan ng pribadong industriya at maliliit na magsasaka, na nagtataguyod ng mga oportunidad sa pagsasama-sama at distribusyon. Papataasin nito ang suplay ng mga ani, na mag-aakit ng mas maraming rehiyonal at pambansang mamimili upang bumili ng mga lokal na ani, at magpapatupad ng mga prayoridad na patakaran sa pagkuha ng mga pangangailangan ng mga estado at institusyon. Ang proyekto ay sasaklaw sa 91 na county sa apat na estado (Virginia, West Virginia, Kentucky, at Tennessee) at maglilingkod sa 349 na negosyo at 938 na kalahok. Inaasahan na ang proyekto ay magpapahusay sa 238 na negosyo at 786 na kalahok, lilikha ng 38 na bagong negosyo at 85 na trabaho, at magpapakinabang ng $732,666 na pribadong pamumuhunan.

People Incorporated Financial Services (PIFS) ay tumanggap ng $486,769 upang ilunsad ang isang bagong programa na nagbibigay ng teknikal na tulong at mga serbisyong advisory sa mga entrepreneurial start-up, mga umuusbong na negosyo, mga yunit ng lokal na pamahalaan, at iba pang mga organisasyong nakabatay sa komunidad upang makilahok at magsagawa ng mga proyektong may mataas na epekto at nangangailangan ng malaking kapital. Palalakasin ng PIFS ang kakayahan ng mga aktor na ito na magsagawa ng mga proyektong nagbabago sa pag-unlad ng komunidad. Ang pagbuo ng kapasidad ay magsasama ng tulong sa kung paano magplano, magbalangkas, magpondo, at magsagawa ng mga proyekto sa pag-unlad ng komunidad at ekonomiya. Magtatayo rin ito ng kakayahan upang mapakinabangan ang maraming mapagkukunan ng pondo, maunawaan, at ma-access ang mga kumplikadong mapagkukunan ng financing, tulad ng New Markets Tax Credits, at tumanggap ng makabuluhang panganib sa pananalapi at organisasyon. Upang pumili ng mga proyekto, makikipagtulungan ang PIFS sa mga rehiyonal, estado, at lokal na organisasyon sa pag-unlad ng ekonomiya, mga lider sa pag-unlad ng komunidad, pribadong pilantropiya, mga ahensiya ng pederal/estado, at mga nakaraang tumanggap ng POWER grant. Inaasahan ng PIFS na makipagtulungan sa walo hanggang sampung natatanging proyekto sa loob ng tatlong taon, na lilikha ng 50 trabaho at magpapakinabang ng $10 milyon na bagong kapital sa mga apektadong komunidad. Ang inisyatiba ay magtutuon sa mga komunidad na apektado ng karbon sa Virginia, West Virginia, Tennessee, at Kentucky.

2019 Mga Tumatanggap ng Grant ng Virginia ARC POWER:

# # #